عزالدين شكري فشير

2.5 اقرب ل3 نجوم

الرواية بدأت بديعة و مشجعة جدا و فيها وصف دقيق لحيرة و تعقيدات النفس البشرية .. حبيت طريقة عرض الشخصيات و فكرة ان حدث يجمع كل الشخصيات دى ببعض و كنت متحمسة اشوف ايه اللى هيحصل ..

لكن من نص الرواية كده -بالتحديد فى نص فصل "ماريك"- بدأ ايقاع الرواية يقل .. ورغم ان فصل "ماريك" بيحكى عن قصة رومانسية جميلة لكن فجأة الموضوع قلب لمناقشات ناس بتنظر و القصة بقى فيها شوية ملل .. لحد ما وصل للفصل اﻷخير عن "سلمى" و لقيت الموضوع قلب فيلم هندى ونهاية مفتوحة و مبهمة و مش مفهوم ايه الحكمة منها..

التلات نجوم كانت لاستمتاعى بكتابة عزالدين بالتحديد فى النص اﻷول من الرواية.. شخصياتى المفضلة هى الموجودة فى النص اﻷول و اللى حبيتها وتعاطفت معاها ، "درويش" -رغم انه بنى ادم صعب- ،"رامى"، "يوسف"، "داوود" -اللى ربما كان مقصود اننا نكرهه حتى لو تفهمنا دوافعه- ،"لقمان" -الى حد معين- ، "رباب" فى النص التانى من الرواية..

متهيألى ان فيه هدف وفكرة ورا القصص دى كلها و ترابطها و اخيرا نهاياتها -المفتوحة و المبهمة و الغير مفهومة-، حاجة مش وصلالى ابدا ،واضح ان "المعنى فى بطن الشاعر"..

شايفة ان لو كانت مجرد قصص عن عرب فى امريكا و معاناتهم و غربتهم كانت بقت اقوى و اكثر تماسكا.. بدل من محاولة خلق طريقة مختلفة و اسلوب "عميق" لتوصيل معنى او فكرة معينة.. انا الحقيقة مستفزة من النهايات "المقطومة" دى .. ليه الواحد ميقراش قصة طبيعية تؤدى لنهاية "مفهومة" بدل الفلسفة دى؟!

مستغربة عنوان الرواية بالتأكيد و اشمعنى العنوان من قصة ماريك ولقمان رغم انهم مش ابطال الرواية، متهيألى ﻷن ده كان الجزء المفضل لعز الدين، هو استفاض فى قصتهم -حيث انها اﻷطول - و كان مزود اوى فى التفاصيل و لم يكتفى بقصتهم بس.. لكنه كمل بحوارات و مناقشات جدلية عن الدين والكنيسة والوطن و السلبية الخ.. مواضيع شفتها برة سياق الرواية والخط العام ليها.. لكن ربما كان ده فصله المفضل و ده اللى خلاه يسمى الرواية باﻷسم ده..

عامة.. "باب الخروج" مازالت المفضلة عندى.. و عزالدين كاتب وروائى جامد و ممتع بالتأكيد..… (mehr)